A Coruña, 26 Xaneiro 2012

COMUNICADO DE PRENSA

CAMPO DE MARTE E COLEXIO CURROS ENRÍQUEZ: MATERIAS PENDENTES

A Asociación de Veciñas e Veciños Atochas – Monte Alto – Torre de Hércules, a través do seguinte comunicado, quere denunciar o estado de esquecemento no que se atopa o Campo de Marte e o Colexio Curros Enríquez, situado no mesmo.

Consideramos imprescindíbel unha mellora integral dun dos parques máis emblemáticos do noso barrio. Un parque que carece, a día de hoxe, duns servizos públicos que cumpran unhas normas básicas de hixiene e limpeza, cando son moitas as persoas que fan uso dos mesmos. Un parque que carece dunha boa iluminación impedindo ás nais e pais poder vixiar aos cativos e cativas que xogan no mesmo e un parque que demanda unha reparación urxente dos xogos infantís e unha ampliación dos mesmos.

Do mesmo xeito denunciamos o estado de abandono no que se atopa o Colexio Curros Enríquez, na zona exterior da Avenida de Hércules, que xa está a provocar desprendementos en parte da súa fachada, como aconteceu hai unhas semanas, co conseguinte perigo para a veciñanza que transita dita rúa así como para as cativas e cativos que fan uso do centro.

A Asociación de Veciñas e Veciños Atochas – Monte Alto – Torre de Hércules esixe ao Goberno Municipal unha resposta ante a demanda dunha veciñanza que, a día de hoxe, non foi escoitada a pesares de ter pedido, a través das instancias oportunas, unha reunión co seu Concelleiro de Barrio Juan de Dios Ruano. Xa notamos que se pasea polo barrio antes das eleccións e logo esquece todo.

ASOCIACIÓN DE VECIÑAS E VECIÑOS

ATOCHAS – MONTE ALTO – TORRE DE HÉRCULES

Foto do desprendemento.

Foto do Servizo Público.

Este non vai ser un paseo para preguiceiros. Vai ter que esforzarse moito o teu tacto, o teu gusto, haberá comida a eito, encherás o teu ouvido con imaxes marabillosas… E sobre todo vai ter que traballar a feito o músculo de pensar, ese sentido que non se ve, que lle chaman imaxinación. Espero que a teñas ben adestrada porque lle imos ofrecer en doses moi altas o alimento que máis a excita: os debuxos, a música e as palabras. (Xurxo Souto)

· Día: Venres 10 Febreiro

· Hora: 18:30

· Lugar: Biblioteca Pública Campo de Marte s/n

O vindeiro Venres 3 de Febreiro, ás 18:00 horas, na Biblioteca Pública Campo de Marte (sede da AVV Atochas – Monte Alto – Torre de Hércules) comezarán as clases de gaita até as 20:00 horas. O prezo son 15 euros por persoa/mes e aínda podedes apuntarvos. Para máis información 981 – 222 635.

Xa está a funcionar o blogue da Plataforma Pola Mobilidade. Podedes facer as vosas achegas informándonos das vosas experiencias co transporte urbán e metropolitano da Coruña.

· Máis información: http://plataformapolamobilidade.blogaliza.org/

As traballadoras e traballadores da Torre de Hércules mandan o seguinte manifesto que facemos público:

OS TRABALLADORES DA TORRE SOLICITAMOS A SOLIDARIEDADE E O APOIO DA BOA CIDADANÍA CORUÑESA

• Sabía Vde. que o Concello elaborou unha escura manobra para desfacerse dos 13 traballadores actuais da Torre de Hércules?

• Sabía Vde. que levamos até 16 anos ininterrompidos de impecable servizo no monumento que representa á cidade?

• Sabía Vde. que gozamos do dereito de subrogación polo que durante todos eses anos pasamos por catro empresas concesionarias distintas sen problema?

• Sabía Vde. que a única argucia legal que pode impedir que conservemos o noso posto de traballo é que non exista continuidade entre a empresa concesionaria que sae e a que entra?

• Sabía Vde. que, por iso, a concelleira Cid e o alcalde Negreira alegan unhas obras menores para pechar a Torre e así deixarnos na rúa?

• Sabía Vde. que a Torre de Hércules leva pechada unha semana sen que se iniciase ningunha obra no seu interior?

• Sabía Vde. que, desde que se coñece a noticia, e a pesar das nosas solicitudes e protestas, ninguén do concello falou con nós?

Os 13 traballadores da Torre sentimos paixón polo noso traballo. Esforzámonos arreo para poder presumir do noso “Patrimonio da Humanidade”. Coidamos e ensinamos con cariño o emblema da Coruña tódolos días do ano a centos de miles de coruñeses e visitantes de todo o planeta. E agora, cunha decisión política de escuras motivacións, vémonos na rúa sen dereito ningún.

O ÚNICO QUE QUEREMOS É QUE O CONCELLO RECOÑEZA O NOSO DEREITO DE SUBROGACIÓN.

En Febreiro, o Xoves 9, ás 20:00, Ciclo de Debates baixo o título «Retomar o Público, Defender o Común» na Biblioteca Pública do Campo de Marte (sede A.V.V. Atochas – Monte Alto – Torre de Hércules). A temática será «Dereitos e Vivenda».

Organizan: Rede Dereitos Sociais, Ergosfera e STOP Desfiuzamentos.

Máis información no cartaz:

Traballadoras e traballadores da Torre (Fotografía de Roci Fraga Rizlinha)

MOITA FORZA!!!

A nova xunta directiva da Asociación de Veciñas e Veciños de Atochas – Monte Alto – Torre de Hércules comunica a todas as súas socias e todos os seus socios que mañá, DOMINGO 15 DE XANEIRO, ÁS 17:00, haberá unha CONCENTRACIÓN DE APOIO ÁS TRABALLADORAS E TRABALLADORES DA TORRE DE HÉRCULES E CONTRA O FECHE DO FARO. SERÁ AO PÉ DA TORRE DE HÉRCULES.

DENDE A ASOCIACIÓN DE VECIÑAS E VECIÑOS CONFIRMAMOS A NOSA ASISTENCIA E O NOSO APOIO INCONDICIONAL A DITAS TRABALLADORAS E TRABALLADORES.

Onte, Venres 13 de Xaneiro do 2012, as votacións á escolla da nova xunta directiva quedaron da seguinte maneira:

• Candidatura Paula Losa Romero: 13 votos.
• Candidatura Alberte Fernández Mariño: 77 votos.

O novo presidente, por 77 votos, será ALBERTE FERNÁNDEZ MARIÑO.

Hoxe, ás 20:00, na Biblioteca Pública do Campo de Marte, asemblea veciñal onde se escollerá a nova xunta directiva. Existen dúas candidaturas: a de Alberte Fernández Mariño e a de Paula Losa Romero. Poderán votar as socias e socios que teñan as cuotas ao día e estivesen dadas e dados de alta antes do 22 de Decembro do 2011.