Os 28 Centros de Educación Infantil e Primaria (CEIP) da cidade participan na campaña “Por un Nadal en galego”
Os nenos e nenas da Coruña enviarán máis de tres mil cartas en galego aos Reis Magos. Esta é unha campaña do Servizo de Normalización Lingüística do Concello da Coruña coa colaboración da Mesa pola Normalización Lingüística.
Máis de tres mil nenos e nenas da Coruña van escribir as súas cartas aos Reis Magos en galego, grazas a unha campaña que foi distribuida desde a Concellaira de Mocidade, Solidariedade e Normalización Lingüística, a todos os centros de ensino público da cidade.
A campaña, que está destinada a nenos de entre catro e sete anos, inclúe ademais da carta aos reis magos, unidades didácticas e guías para mestres e para pais e nais.
As guías e unidades didácticas teñen como obxectivo, ademais de fomentar o uso do galego, orientar os cativos para que a elaboración da carta sexa un proceso creativo e imaxinativo, e vaia máis alá dunha enumeración de agasallos sinalando nun catálogo, tendo en conta valores como o consumo responsábel ou o respecto ao medio ambiente. Tamén se promove a utilización de xogos colectivos e non sexistas, así como na recuperación de tradicións galegas vinculadas co Nadal.
As unidades didácticas conteñen seis actividades entre as que podemos atopar quebracabezas, actividades de relacionar obxectos, coloreado de debuxos, comprensión oral e escrita, todas elas relacionadas coa tradición da noite de reis.
Desde a Concellaría de Mocidade agradecemos a boa acollida que estes materiais tiveron entre o profesorado de infantil e primaria.
